Manual Autoridades

Aínda que existen outras vías, a forma máis efectiva de crear un novo rexistro de autoridade en Alma é o emprego do padrón predefinido. O procedemento a seguir é:

1. Comprobar en Alma se existe xa unha autoridade para o PDI (buscar cun e con dous apelidos)
2. Comprobar en Alma e en Iacobus se temos referencias bibliográficas do autor. Como norma xeral, se non hai referencias no catálogo, non crearemos un rexistro de autoridade.
3. Tras as comprobacións pertinentes crearemos o novo rexistro no MDE empregando o padrón "Autor PDI"

No padrón, coa finalidade de facer máis sinxela a introdución dalgúns campos, inclúense textos que deben ser substituídos polos datos particulares da persoa que corresponda. Por exemplo, o lugar de nacemento na etiqueta 370 ou a área de coñecemento na 372.

Noutros casos, cando se trata de datos invariables, no patrón quedan recollidas as diferentes posibilidades. Por exemplo, os datos do campus de Santiago ou de Lugo, o xénero “Masculino” e “Feminino”.

Como linguas aparecen recollidas as máis comúns. O catalogador só terá que eliminar a información que non proceda. 

A posibilidade de facer un novo rexistro duplicando un existente non é a forma máis recomendable de crear un rexistro de autoridade. Aparte do risco de deixar información correspondente a outra autoridade, hai que ter en conta que as autoridades do PDI migraron a Alma con campos que xa non son aplicables:

• nos rexistros migrados aparecen etiquetas como a 907 que contén o identificador da autoridade de Millennium, ou a 035 cun número de control de sistema. Estes identificadores son únicos e non deben repetirse noutros rexistros porque provocan coincidencias erróneas.
• a nota “Autores galegos na USC” figura naquelas autoridades que se exportaron á Base de datos Autores galegos na BUSC. Esta base de datos deixou de ser alimentada ao comezo do 2020, polo que ningunha autoridade creada con posterioridade a esa data debería ter esa nota.