Manual Autoridades

Normas que deben servir de guía para o traballo do control de autoridades.

• Formato MARC21 de Autoridades: é a fonte obrigada para a codificación Marc dos rexistros de autoridade en Alma. O emprego do formato MARC21 é imprescindible para que os rexistros de autoridade interactúen correctamente cos rexistros bibliográficos.
• Manual de Autoridades da BUSC: regras establecidas pola BUSC para elaborar e codificar os distintos tipos de rexistros de autoridade
• Regras de catalogación. Capítulo 15: algunhas destas directrices seguen vixentes coas excepcións establecidas por RDA mencionadas en distintas partes deste documento e no Manual de catalogación en RDA
• RDA toolkit. Sección 3, Rexistro de atributos de persoa,  familia e entidade corporativa e Sección 4, Rexistro de atributos de concepto, obxecto, evento e lugar

Ademais das normas de uso obrigado existen unha serie de fontes que deben ser consultadas no momento da creación ou modificación dun rexistro de autoridade. Estas fontes serán reflectidas no campo MARC  670  do rexistro para explicar e xustificar a información gravada tanto no punto de acceso autorizado como nas variantes.

Fonte para as autoridades de materia

• Répertoire de Vedettes-Matière da Bibliothèque de l’Université Laval: é a fonte principal para as autoridades de tema 150 e de lugares xeográficos 151. O Repertorio Laval  pode ser consultado en liña na dirección https://rvmweb.bibl.ulaval.ca

Fontes para nomes de persoa e entidades galegas

• Fontes impresas (enciclopedias e dicionarios especializados)
• Fontes en liña, como o Portal da Investigación da USC, Galipedia, EGU, etc.

Fontes para nomes de persoa e entidades non galegas

• Para autores españois ou hispanos, a nosa fonte principal será o Catálogo de Autoridades da BNE
• Para autores estranxeiros, a nosa fonte principal será o Catálogo de Autoridades da Biblioteca do Congreso
• Outras fontes a empregar no caso de non atopar resultados nas anteriores: Catálogo de autoridades do CSIC, Catálogo de autoridades da Universidad de Salamanca, Càntic: Catàleg d'Autoritats de Noms i Titols de Catalunya, Catálogo de Autoridades da Biblioteca Nacional de Francia, VIAF

Fontes para as autoridades de nome xeográfico

• O Nomenclátor da Xunta, para os topónimos de Galicia (coa advertencia de que nós non pospoñemos o artigo inicial)
• Atlas de Galicia e de España. Anaya, 1996 (apéndices) e Enciclopedia Universal Galega (Ir Indo) para os topónimos de España e os universais
• Para os topónimos de España e universais que non aparezan na fonte anterior empregaremos o Tesauro ISOC de Topónimos​
• Lista de exónimos en galego elaborada polo Servizo de Normalización Lingüística da USC 

Fontes para as autoridades de Xénero e Forma

Lista controlada de termos establecidos na BUSC cun vocabulario propio (buscxf), e que seguen de preto a estrutura de:

• As autoridades de Género/Forma da Biblioteca Nacional
• As autoridades de RVMGF (Genre/Forme) do Répertoire de vedettes-matière Laval

 

IMPORTANTE!: Ter en conta que o Répertoire de Vedettes-Matière da Bibliothèque de l’Université Laval non contén nomes propios coa excepción de:

• personaxes ficticios e/ou lendarios
• divindades e deuses individuais
• nomes xeográficos administrativos 

Para a construción dos puntos de acceso de nomes coa capacidade de ser autores (persoas, entidades corporativas, etc.) hai que seguir sempre as convencións da catalogación descritiva, é dicir, as regras RDA recollidas neste manual. En cambio, para os puntos de acceso de nomes que só poden ser materia, respectar as indicacións do RVM.

 

150 ## $a Don Juan (Personaxe lendario)

110 ## $a Château de Chenonceau (Chenonceaux, Francia)

Pode ser problemático decidir se unha entidade debe ser establecida conforme á normativa RDA para puntos de acceso autorizados ou conforme á normativa para materias do RVM. Para evitar confusións, consultar a lista de termos ambiguos do formato Marc21