Manual de Formación en Competencias en Información da BUSC

1. Preparación/actualización dos contidos e exercicios do curso.

Desde a Coordinación de FUBUSC Contidos faise un reparto das tarefas de revisión entre os centros, partindo das aulas repositorio (ou matriz) que a BUSC ten no Campus Virtual da USC (ao final de cada curso académico, entre maio e agosto).

É tamén o momento de crear novas guías e titoriais, de forma coordinada co grupo responsable destes contidos na BUSC.

2. Programación dos Cursos CI para a publicación da resolución reitoral anual para o recoñecemento do crédito ECTS:

Desde a Sección Servizos pídese aos centros que anoten nun Excel compartido no SharePoint de FUBUSC o período de matricula e inicio/finalización dos cursos básico e avanzado que se van desenvolver durante o curso académico seguinte (xuño/xullo).

Téndese á creación do número mínimo de accións formativas posibles , polo que aquelas bibliotecas que comparten titulacións (dobres graos) ou áreas de coñecemento afíns (Humanidades, Ciencias Sociais...) programan unha soa actividade conxunta, que dará lugar á creación dunha aula compartida no Campus Virtual, que xerá xestionada de forma colaborativa polas bibliotecas que titorizan esa actividade.

3. Presentación da Biblioteca, e promoción dos cursos CI entre o alumnado de 1º e TFG ou último curso do grao (ao inicio do curso académico -setembro-).

Cada biblioteca encárgase de coordinar co Decanato e profesorado do seu centro as actividades necesarias para dar a coñecer a biblioteca e os cursos entre o estudantado, e incentivar a matrícula a través das canles que considere oportunas (cartelería, mensaxería, novas na web do centro e da biblioteca, redes sociais, etc.)

Respecto do nivel avanzado, adóitase presentar o curso CI na sesión de presentación da materia TFG que organiza o profesorado de cada Facultade.