Manual de Formación en Competencias en Información da BUSC

A matrícula do alumnado de Grao nos cursos CI realízase a través da Secretaría Virtual do Alumnado, na sección Actividades, cursos e probas / Oferta.

Unha vez localizada a acción formativa dirixida á súa titulación, a alumna ou alumno debe premer en Matricularse (para que esta opción apareza activada debe estar aberto o prazo de matrícula).

Cada curso académico, a coordinación dos cursos CI deseña un documento coas instrucións para a matrícula, que se elabora en formato pptx, se transforma a PDF e se sube á carpeta de Material promocional dos cursos, na intranet do grupo FUBUSC Coordinación. Dentro desta carpeta hai unha subcarpeta para o Ano en curso, na que se deposita este material, así como un documento README.txt coas instrucións para a elaboración da cartelaría promocional dos cursos.

ANULAR A MATRÍCULA

Cando unha persoa se matricule por erro nunha actividade, debe solicitar por escrito a anulación da matrícula enviado un correo a biblioteca.universitaria.servizos@usc.gal.

A biblioteca encargarase de avisar ao servizo de xestión académica para que procese a solicitude.

De non anular a matrícula, ao/á estudante apareceralle esta actividade como "Non apta/o" no seu expediente. É por iso que desde a Coordinación porase á disposición das bibliotecas no SharePoint de FUBUSC a listaxe do alumnado matriculado nas actividades mentres estea aberto o prazo de matrícula, co fin de que os centros a consulten e poidan advertir ao alumnado dos posibles erros e,desta forma, estes poidan subsanalos matriculándose na actividade correcta en prazo.

EXEMPLO DE MENSAXE

Estimado/a alumno/a,
se recibiches esta mensaxe é porque te matriculaches nun curso de CI que non corresponde á túa titulación. Isto impedirache obter o crédito polo que, se tes interese no mesmo, recomendamos que te matricules no curso apropiado á túa titulación o antes posible: [BUSC.2223.7] - Competencias en Información. Nivel Avanzado. Humanidades. 1ª Ed.

Ademais, para que non apareza no teu expediente o "Non apto" na actividade  na que te matriculaches por erro, debes solicitar a anulación da matrícula nesa actividade. Para iso envía un correo a biblioteca.universitaria.servizos@usc.gal, indicando o teu nome e apelidos, DNI, correo institucional e curso no que solicitas a anulación da matrícula: [BUSC.2223.5] - Competencias en Información. Nivel Básico. CC Xurídicas. Políticas. RRHH. 1ª Ed

Se precisas axuda contacta coa túa Biblioteca.

MATRÍCULA FÓRA DE PRAZO 

1. PROCEDEMENTO CANDO EXISTE CAUSA XUSTIFICADA

Cando o alumnado solicita matricularse nun curso CI fóra de prazo debemos analizar as causas, e só iniciaremos o trámite de matrícula a través do Servizo de Xestión Académcia (SXA) en caso de estar xustificado:

• hospitalización,
• cambio de titulación,
• acadou praza no Grao nun prazo de matrícula posterior á ao prazo de matrícula do curso CI,
• alumnado do último ano de carreira, sempre que se trate da 2ª edición do curso CI, e/ou xa non haxa ocasión de realizalo posteriormente.

O trámite será o seguinte:

1. A persoa responsable da formación dirixirá un correo-e á Sección Servizos da BUSC (biblioteca.xeral.servizos@usc.gal) que deberá incluir:
   • Nome e Apelidos da persoa solicitante
   • DNI
   • Correo institucional
   • Causa que xustifica a solicitude
   • Nome e código do curso CI no que solicita a matrícula
   • Se solicita ou non a imputación do ECTS no expediente
2. A Sección enviará:
   • A solicitude de matrícula ao SXA.
   • A solicitude de acceso ao Campus Virtual ao CeTA (só no caso de que o SXA denegue a matrícula fóra de prazo)
   • A notificación ao responsable do curso CI de que o/a alumno/a está matriculado ou de que ten acceso á aula -quen deberá, á súa vez, informar ao alumnado-.
3. Unha vez matriculado o alumnado na aula virtal, a persoa responsable da formación deberá incluir a cada estudante no grupo que lle corresponda segundo a súa titulación.

2. PROCEDEMENTO CANDO NON EXISTE CAUSA XUSTIFICADA

De forma excepcional, para o alumnado que desexa acceder á formación fóra de prazo sen xustificación a Biblioteca poderá ofrecerlle o acceso á aula no Campus Virtual -a través do CeTA-, pero deberá informarlle de que aínda que supere o curso non obterá o ECTS nin o diploma -posto que este alumnado non se matriculou pola Secretaría Virtual (SV) e, polo tanto, non está en Xescampus-.

A persoa que reciba a solicitude de matrícula considerará favorablemente estas peticións sempre que non transcorreran máis de cinco días naturais desde o inicio do curso e, ademais, se dea algunha destas dúas condicións:

• que o curso CI estea vinculado a algunha materia do Grao, xa que o profesorado adoita telo en conta como parte da avaliación da súa materia, ou ben,
• que a solicitude sexa por causa xustificada pero xa pasaran entre 2 e 5 días desde o comezo do curso, especialmente cando a persoa non poida realizar a formación CI máis adiante (alumnado de último curso de Grao, Erasmus, etc.)

Aceptada a solicitude, a persoa responsable deberá:

1. Responder ao alumnado segundo o modelo de mensaxe que se achega abaixo.
2. Recibida confirmación por parte do alumnado de que acepta estas condicións para o acceso ao curso, elevar a petición á Sección servizos que, á súa vez, enviará a solicitude ao CeTA, con copia CC á persoa responsable.
3. Unha vez o alumnado teña acceso á aula virtal, a persoa responsable da formación deberá incluir a cada estudante no grupo que lle corresponda segundo a súa titulación..

O alumnado que acade o apto no curso e non puidera obter o crédito ou o diploma por non estar matriculado pola SV, poderá matricularse noutra edición do curso só aos efectos de acadar estas acreditacións, sen ter que realizar de novo a formación. A Biblioteca deberá informar desta posibilidade ao alumnado, e levar un rexistro destas persoas a fin de identificalas como aptas en futuras edicións do curso.

EXEMPLOS DE MENSAXES PARA O ALUMNADO

CON CAUSA XUSTIFICADA (máximo ata o día de comezo do curso)

Bo día,

avaliada a causa que lle impediu a matrícula en prazo no curso Competencias en Información para Alumnado de Grao. Nivel Básico. 2ª Ed. [BUSC.2425.2] [2024/2025], a Biblioteca considera que está xustificada, polo que procedemos a tramitar a súa solicitude.

Nun prazo breve terá vostede acceso ao curso no seu Campus Virtual.

Atentamente,

A Biblioteca.

SEN CAUSA XUSTIFICADA (máximo ata o 5º día desde o inicio do curso)

Bo día,

informámoslle de que non é posible tramitar a súa solicitude de matrícula no curso Competencias en Información para Alumnado de Grao. Nivel Básico. 2ª Ed. [BUSC.2425.2] [2024/2025] a través do servizo de xestión académica, dado que non existe causa xustificada para realizala fóra do prazo e o curso xa comezou.

Doutra banda, a Biblioteca ofrece a posibilidade de darlle acceso a esta formación a través do Campus Virtual. Mais, ao non constar a matrícula no servizo de xestión académica, non terá dereito nin ao crédito ECTS nin ao diploma de aptitude.

Mediante esta modalidade de acceso acadará as competencias en información e, de estar vinculado a unha materia das que cursa na súa titulación de Grao, a Biblioteca trasladará a cualificación obtida ao coordinador desta materia. De interesarlle as acreditacións, deberá volver matricularse na vindeira edición do curso CI que se ofreza desde a BUSC.

Se opta por esta solución, por favor responda a esta mensaxe o antes posible.

Un saúdo,

A Biblioteca.

PREGUNTAS FRECUENTES

1. Podo matricularme no nivel avanzado sen ter feito o nivel básico? Sí, son independentes

2. Podo facer os dous niveis a un tempo? Si, pero recomendamos facer o básico nos primeiros cursos de Grao e o avanzado no último curso.

3. O curso é gratuíto? Por que na secretaría virtual di que " se dispón de 5 días para pagar"? Esta información aparece por defecto en todos os cursos, pero ao premer en "matricularse" xa pon que é gratuíto.

4. Matriculeime no curso pero non me aparece a aula no meu Campus Virtual. A aula aparece no momento en que comeza o curso. recibirás unha mensaxe de benvida na túa caixa de correo institucional.

5. Se teño o diploma/crédito polo curso básico que acadei mentre estudaba Bioloxía, podo convalidar o curso básico de Dereito que é o que estou estudando este ano? Non, non se admite a convalidación entre cursos CI. Podes facer o curso de novo e obter outro crédito.

6. Como estudante de posgrao (Máster, Doutoramento...) podo facer o curso básico/avanzado? Podes facelo -non está restrinxida a matrícula- pero non tes dereito ao ECTS, aínda que si ao diploma.