Para acceder a Zenodo hai que premer no menú superior en "Log in", que nos levará ao menú de acceso e rexistro. Hai varias formas de identificación, mais recomendamos o acceso a través de ORCID.
Na barra superior aparecerá o noso nome o o botón "+" para engadir o novo rexistro do dataset:
O primeiro que hai que facer é seleccionar a comunidade onde depositalo, a través dun buscador que se activa no botón "Select a community". Tecleamos 'Universidade de Santiago de Compostela' e prememos na lupa para seleccionar a nosa comunidade en Zenodo:
Unha maneira alternativa sería localizar primeiro a comunidade da USC en Zenodo e despois premer no botón "New upload":
O seguinte paso é engadir os arquivos, cun límite de 100 ficheiros e 50 Gb por conxunto:
Para unha correcta utilización dos datos de investigación recoméndase a creación e depósito dun ficheiro de texto plano denominado 'Readme', no que se inclúa información sobre a autoría, título, metodoloxía, breve descrición do conxunto de datos, dereitos de uso, etc. Débese publicar en inglés, para asegurar un maior alcance dentro da comunidade investigadora. Achégase un modelo para a súa redacción elaborado polo Consorcio Madroño para o depósito en e-cienciaDatos e unha guía para redactar estes ficheiros da Cornell University.
A partir de aquí comeza o proceso de introdución dos metadatos ou descrición do dataset para poder identificalo correctamente.
En "Basic Information" introducimos os seguintes campos (os marcados con asterisco son obrigatorios):
Digital Object Identifier*: no caso de ter xa un DOI para o conxunto, por estar depositado noutro repositorio ou publicado nunha revista ou outra fonte, copiamos o sufixo deste na caixa; se non, marcamos "No" e o sistema reservará un DOI para o conxunto.
Resource type*: no menú despregable escollemos a opción 'dataset'.
Title*: enchemos o campo e, se é preciso engadir máis títulos, prememos no botón "Add titles" para introducir o título adicional, a súa tipoloxía e, no seu caso, o idioma.
Publication date*: por defecto, aparece a data en que se engade a Zenodo; no caso de que o conxunto xa fose publicado, introducimos esa data no formato AAA-MM-DD ou ben só AAAA.
Creators*: hai que premer en "Add creator" e abrirase unha nova xanela para localizar os autores persoais ou institucionais, ou ben para crealos e engadir os seus datos de identificación e afiliación. Prememos en "Save and add another" no caso de ter que introducir varios autores.
Description: introducimos unha descrición xeral do recurso; se prememos en "Add description" poderemos seleccionar o tipo de información a engadir (resumo, táboa de contidos, métodos, notas, etc.).
Licenses: por defecto, ofrécese unha licenza internacional Creative Commons 4.0. Pódese cambiar ou ben engadir unha nova, por exemplo para o caso de incorporar software. Facemos clic en "Add license" e o sistema amosa os tipos de licenza listados polos recomendados e os adecuados para conxuntos de datos e para software.
Na seguinte sección "Recommended information" introducimos:
Contributors: engadimos os colaboradores do mesmo xeito que no campo "Creators".
Keywords and subjects: introducimos na caixa de busca cada termo para que se amosen os suxeridos e escoller un destes do menú despregable ou ben engadilo.
Languages: buscamos na caixa o(s) idioma(s).
Dates: introducimos calquera outra data relevante diferente á data de publicación do conxunto.
Version: segundo o menú de axuda de Zenodo, acéptase calquera formato mais recoméndase un versionado semántico segundo semver.org.
Publisher: por defecto, amósase Zenodo como o editor.
Continuamos co apartado "Funding", co campo:
Awards: no botón "Add award" abrirase unha xanela para localizar os datos da entidade financiadora ou ben introducilos en "Add custom".
Nas seccións seguintes:
Alternative identifiers: prememos en "Add identifier" para engadir un novo identificador segundo un dos esquemas que se amosa no menú despregable (Handle, DOI, ARK, etc.).
Related works: localizamos e engadimos, a partir dos seus identificadores persistentes, aqueles traballos relacionados co conxunto de datos que estamos describindo, a súa relación e o esquema utilizado e, opcionalmente, o tipo de recurso do que se trate:
References: engadimos aquela información bibliográfica que usásemos na elaboración do conxunto de datos nun formato normalizado.
Para finalizar o depósito, no menú lateral dereito debemos seleccionar se concedemos ou non acceso aos ficheiros, marcando "Public" ou "Restricted" (se seleccionamos esta última opción tamén podemos engadir un período de embargo).
Nese mesmo menú lateral, na sección "Draft" marcamos "Save draft" ou "Preview" segundo queiramos visualizar a descrición ou gardala para continuar noutro momento e, se rematamos co proceso, seleccionaremos "Submit for review" para enviar o ítem á Biblioteca Universitaria, que revisará os metadatos e publicará o conxunto na comunidade da USC en Zenodo.
Desde o apartado "My dashboard" do menú superior, poderemos visualizar todos os envíos realizados, retomar os que están pendentes de envío para editar, e recuperalos por filtros segundo o estado ou o tipo de recurso, por exemplo.
| Titorial: Como publicar un dataset ou un plan de xestión de datos en Zenodo (Biblioteca da Facultade de Economía e Empresa, UDC). |
