Citar en estilo APA

Son múltiples as razóns que xustifican un uso preciso das citas e referencias en relación ás fontes utilizadas nun traballo de académico ou de investigación:

1. Compromiso ético. Todo traballo académico ou de investigación implica un importante esforzo intelectual que nos gusta ver recoñecido. De maneira recíproca deberemos recoñer a labor dos autores e autoras que fundamentan e inspiran os nosos textos.
2. Ferramenta de avaliación. Con independencia dos criterios específicos aplicados en cada contexto (TFG, TFM, Tese de Doutoramento, artigo científico...), o uso dun sistema de citas e referencias preciso permite:
   • Valorar os coñecementos que a persoa autora ten da área de coñecemento na que se insire o traballo.
   • Distinguir con claridade a orixinalidade das achegas realizadas pola persoa autora do traballo. A orixinalidade dos traballos académicos é un requirimento en todos os niveis e o plaxio está severamente perseguido.
3. Práctica consolidada na comunidade académica e científica. No ámbito da produción e comunicación académica o correcto uso dos sistemas de citación e referencia é unha destreza imprescindible e un indicativo de calidade. A través dunha precisa citación e redacción de referencias facilítase a localización das fontes utilizadas. Isto permite:
   • Verificar os datos, interpretacións e contidos incluídos nun traballo académico.
   • A ampliación, de maneira autónoma por parte dos/das lectores/as, da bibliografía propia sobre as cuestións abordadas no traballo.
4. Cumprimento das leis de propiedade intelectual. A lei vixente de propiedade intelectual recoñece a paternidade dunha obra como un dereito moral irrenunciable dos autores e autoras. O uso adecuado das citas e referencias é clave para garantir unha adecuada atribución da autoría consonte a este dereito.

PARA SABER MÁIS... Citas e referencias bibliográficas (Guía da BUSC)

Non é necesario realizar a correspondente cita cando incluamos os seguintes aspectos nos nosos traballos:

• Feitos ou datos de coñecemento común
• Achegas, reflexións e ideas propias

Hai moitos e variados estilos ou normas de citación e referencia.

Algúns proceden dunha institución internacional que elabora un modelo de cita e referencia para as súas publicacións ou as dun determinado campo de coñecemento. Imos ver que estilos podemos atopar:

• Estilo APA, desenvolvido pola American Psychological Association (APA). Este estilo emprégase fundamentalmente no campo da psicoloxía, ciencias sociais e humanidades.
• Estilo MLA (Modern Language Association), empregado en lingüística e filoloxía.
• Estilo Vancouver, moi empregado en publicacións de medicina e biomedicina. Este estilo desenvolveuno o International Committee of Medical Journal Editors (ICMJE).
• Estilo IEEE, desenvolvido polo Institute of Electrical and Electronics Engineers para as súas revistas. Tamén se emprega noutras publicacións de enxeñaría.
• Estilo Chicago e Estilo Harvard, son estilos creados polas prestixiosas universidades que levan o seu nome para que os seus alumnos e profesores empregaran a normativa elaborada pola propia universidade.
• Norma AENOR 2013 e ISO 210, que marcan as pautas para a cita e referencia de documentos impresos e electrónicos. Estas non se consideran un estilos en si mesmos, sen embargo serven de base para un gran número de estilos que levan o apelido ISO 690.