María Luz Morales naceu na Coruña e trasladouse coa súa familia a Cataluña sendo cativa. Diplomouse en Filosofía a Letras co desexo de dedicarse ao xornalismo. Comezou traballando na revista El hogar y la moda (actualmente a revista Lecturas), para ao pouco tempo pasar a La Vanguardia, onde asinaba co seudónimo Felipe Centeno as súas críticas cinematográficas. Máis tarde, sería a encargada de realizar no mesmo xornal a crítica teatral, na que utilizaba xa o seu verdadeiro nome. Ademais do seu traballo como xornalista, participou como asesora literaria na tradución e adaptación ao cine sonoro dos filmes da Paramount. Co estalido da Guerra Civil en 1936, La Vanguardia pasa a estar controlado por un comité obreiro da CNT-UXT e Morales é nomeada directora. Deste xeito, convértese na primeira muller en dirixir un xornal en España. Debido ao seu compromiso político, republicano e galeguista, foi encarcerada durante corenta días no convento barcelonés de Sarriá. Tras o fin da contenda e co triunfo do bando golpista, queda inhabilitada para exercer o xornalismo, polo que se centra na escrita de novelas, a tradución e a actividade editorial, coa creación da editorial Surco. Na actualidade, os Premios María Luz Morales outorgados pola Academia Galega do Audiovisual teñen como obxectivo fomentar a investigación sobre o audiovisual en lingua galega.
