|
"Nunca esmorecerá en Galicia o agradecemento a García Lorca polo don dos Seis Poemas Galegos" Xosé Luís Méndez Ferrín |
Aínda non rematada a Guerra Civil a obra galega de Lorca estaba xa a ser editada de novo, desta vez, como non podía ser doutro xeito, no territorio do exilio. Publícaa a editorial Losada de Bos Aires en 1938, no marco das obras completas do poeta granadino.
Deste lado do Atlántico consta a insólita presenza de dous dos poemas galegos no diario conservador El Compostelano en 1938 e 1939, e xa en plena posguerra, en 1946, publícanse os seis poemas na revista Finisterre, realizada daquela en Madrid.
En Galicia os Seis poemas galegos non volverán ser publicados ata 1955, cando a editorial Galaxia os inclúe no volume IV da súa influínte Escolma de poesía galega, preparada por Francisco Fernández del Riego. Desde entón a obra galega de Lorca foi obxecto de edicións dentro e fóra de Galicia, os seus versos foron traducidos a diversos idiomas e reinterpretados musical e visualmente, incluso en formato escultórico.
