BUSC - Procedementos de traballo

As novas que aparecen na web da BUSC teñen a seguinte estrutura:

• Titular: resumo de xeito conciso e directo do contido da nova.
• Entradiña: parágrafo que aparece xusto debaixo do titular e que debe resumir os datos máis significativos da nova para que o lector comprenda rapidamente o tema da noticia. Debe estar redactada de forma clara e precisa.
• Data de publicación: data na que se publica a nova. 
• Corpo da nova: redactaremos de xeito detallado a información. A organización estrutúrase en orde descendente de importancia, do máis relevante ao menos. Cada parágrafo debe conter unha idea.
• Imaxe: os formatos permitidos son png, gif, jpg e jpeg. Límite 64 megas. As imaxes deben ser maiores de 1160x420 píxeles.
• Pé de foto: descrición da imaxe.
• Ladillos: cando a información é ampla utilizamos este recurso para separar parágrafos que tratan temas distintos. Cada parágrafo pode levar unha imaxe asociada, que deberá ter formato png, gif, jpg ou jpeg e ser maior de 900x507 píxels.

Á hora de enviar unha nova desde unha biblioteca de centro para ser publicada na web da BUSC, deberemos ter en conta que os campos obrigatorios de toda nova son: titular, entradiña, corpo da nova, imaxe principal e data na que queremos que saia publicada. 

As imaxes deberán estar nos formatos mencionados anteriormente e ter as dimensións axeitadas para poder ser utilizadas no xestor de contidos.

O correo enviarase á seguinte dirección:  buscxestionweb@grupos.nube.usc.gal.

A estrutura dun evento na web da BUSC é a seguinte: 

• Tipoloxía do evento: cursos, deporte, divulgación, seminarios, congresos, cultura, conferencias, actos institucionais, teses.
• Titular: descrición breve do contido do evento.
• Entradiña: parágrafo que aparece xusto debaixo do titular e que debe resumir os datos máis significativos do evento para que a persoa lectora comprenda rapidamente o seu contido. Debe estar redactada de forma clara e precisa.
• Corpo: redactaremos de xeito detallado a información. A organización estrutúrase en orde descendente de importancia, do máis relevante ao menos. Cada parágrafo debe conter unha idea.
• Imaxe principal: máximo un arquivo. Límite de 64 MB. Tipos permitidos: png, gif, jpg e jpeg. As imaxes deben ser maiores de 900x507 píxeles.
• Data e hora: día e hora de inicio e fin do evento.
• Localización: enderezo e espazo.
• Organizador: no caso de realizar un evento en colaboración indicaríase aquí.
• Outra información: permite engadir PDFs con información adicional, códigos QR, outras imaxes.... Esta información aparecerá, polo xeral, na sección lateral dereita da pantalla. 

Á hora de enviar un evento desde unha biblioteca de centro para ser publicada na web da BUSC debemos ter en conta que os campos obrigatorios son: tipoloxía de evento, titular, entradiña, corpo, imaxe principal e data e hora de inicio e fin do evento.

O correo enviarase á seguinte dirección:  buscxestionweb@grupos.nube.usc.gal.

PROCEDEMENTO PARA A DIFUSIÓN

1. Sara Cid (saram.cid@usc.es), da B. Xeral, encargarase de facer os eventos na web da BUSC. Cando sexa un evento de carácter cíclico, fará tamén unha nova para presentalo, pero os seguintes eventos dun mesmo ciclo irán só na axenda -salvo excepcións xustificadas que necesiten de reforzo con algunha outra nova na web-.
2. Desde o Servizo de Información da B. Xeral (biblioteca.universitaria.informacion@usc.gal) enviarán unha mensaxe á Xunta Técnica (busc-xuntatecnica@grupos.nube.usc.gal) para que nas direccións dos centros saiban dos eventos que teñen lugar na BUSC. A mensaxe incluirá un enlace á noticia ou ao evento da axenda, segundo os casos, solicitando tamén difusión desde as bibliotecas de centro sempre que sexa pertinente (a valorar polas direccións). Non se enviarán mensaxes á XT para os eventos cíclicos que se repiten nos centros da BUSC (p.ex, exposicións itinerantes).
3. Bianca Cebeiro (bianca.cebeiro@usc.es), da B. Xeral, encargarase de promocionar os eventos nas RRSS. Para Instagram seleccionará as contas das bibliotecas que farán de colaboradoras na difusión, segundo a temática de cada evento.
4. Todos os centros deberán recoller estatísticas dos eventos realizados, sexan formativos (datos REBIUN) ou de extensión bibliotecaria (BUSC en cifras). Os realizados pola BUSC e pola B. Xeral serán contabilizados polo Servizo de Información a través deste ficheiro Excel.

INSTRUCIÓNS SOBRE O IDIOMA E/OU O FORMATO

• Sexa cal sexa o idioma no que se realiza o evento, poremos o título, descrición, etc., en galego. A única excepción será para o título das formacións que se desenvolven en inglés.
• Usaremos o campo Descrición ou Notas para dar a información relevante sobre o evento sempre que sexa necesario.
• No campo de Notas indicaremos sempre o idioma no que se desenvolve o evento, especialmente se son accións formaivas.

O sistema de cartelaría dixital permite, ademais de reutilizar contidos da web da BUSC (só bibliotecas Intercentros de Lugo e Concepción Arenal), a emisión nos puntos de información de contidos personalizados. Por punto de información referímonos a cada unha das pantallas ou monitores instalados nos centros.

Estes contidos poden ser de tres tipos: 

• IFrame 
• Texto + Imaxe 
• Vídeo 

Polo de agora utilizaremos o formato de texto + imaxe. 

Cando enviamos unha nova ou un evento ao que lle queremos dar visibilidade nas pantallas dos nosos centros, deberémolo facer en formato JPG, GIF, JPEG ou PNG, cun límite de 64 megas. O formato PDF non é compatible.

No correo que enviemos ao responsable de actualizar a información nos centros deberán constar os seguintes elementos: 

• Título: é a idea que queremos resaltar. Deberá ser o máis breve e clara que sexa posible. 
• Imaxe: é o que se visualizará no punto de información. É importante no caso de cursos ou xornadas incluír a data e a hora de inicio dos mesmos e a forma de inscrición, á que debemos remitir a través dun QR asociado.
• Texto alternativo: descrición da imaxe que aparecerá en caso de existir problemas de conexión ou de carga. É importante en termos de accesibilidade. 
• Data de inicio de vixencia: o día e a hora na que queremos que a nosa información sexa visible.
• Data de fin de vixencia: o día e hora no que queremos que cese de emitirse.

Neste exemplo aparece claramente identificado o contido do curso, a data e hora do mesmo, e os códigos QR que dan acceso ao sistema de conexión e a un PDF con máis información sobre o mesmo.

Nos micrositios das bibliotecas de centro e intercentros podemos crear seccións laterais para engadir un elemento de tipo "Máis información".

1. Entrar en Drupal coas credenciais institucionais para editar o micrositio da biblioteca.

2. Localizar o menú de Seccións laterais. Premer en Engadir Máis información.

3. Segundo se trate dunha ligazón ou dun documento elixiremos unha lapela ou outra. De ser unha ligazón, copiaremos a URL no campo correspondente e, en Texto do enlace elixiremos o texto que desexamos que se visualice no menú lateral do micrositio.

4. Se se trata dun documento, eliximos a lapela correspondente e cargamos o documento desde o noso equipo, premendo no botón Examinar. Tras agregalo, deberemos cubrir o campo Descrición co texto que desexamos se visualice no micrositio.

5. Premer en Gardar, no menú superior, para que se publiquen os cambios na web da biblioteca.