Persoas usuarias da comunidade universitaria
A tarxeta universitaria de identidade da USC (TUI) é o elemento de identificación dos membros da Comunidade Universitaria ("Regulamento da Tarxeta de Identidade da USC", aprobado polo Consello de Goberno do día 28 de decembro de 2022). É un documento de identificación persoal e intransferible.
A TUI ten carácter obrigatorio para os seguintes colectivos da USC:
- Alumnado de títulos oficiais: grao, máster e doutoramento.
- Alumnado de títulos oficiais impartidos en centros adscritos, nos termos fixados no convenio.
- Alumnado de mobilidade e intercambio con destino na USC.
- Persoal docente e investigador.
- Persoal técnico, de xestión, de administración e servizos.
- Persoal investigador.
- Persoal emérito e ad honorem.
A TUI tamén pode ser solicitada polos seguintes colectivos:
- Alumnado de títulos propios.
- Alumnado de IV Ciclo.
- Alumnado de titulacións interuniversitarias oficiais nas que participe a USC, nos casos en que realizasen a súa matrícula noutra universidade.
- Alumnado de centros vinculados, nos termos fixados no convenio.
Incidencias e caducidade da TUI
As incidencias sobre a expedición da TUI serán xestionadas a través do correo tui@usc.gal.
As incidencias de carácter tecnolóxico tramitaranse a través do correo do CAU: cau@usc.gal.
Antigos membros da USC (Alumni)
(Ex-alumnado, ex-PDI e ex-PTXAS), unha vez finalizada a súa relación coa USC, pasan á categoría de Grupo de Usuarios/as Alumni na súa conta externa en Alma. Nunha conta interna no caso de Alumni sen credenciais na USC.
Persoas usuarias externas á Comunidade Universitaria
Poderán solicitar a carta de lector/a da BUSC en calquera biblioteca e concederáselles directamente, sen facer ningunha solicitude (previa acreditación da súa pertenza a algún destes grupos), aos seguintes solicitantes:
- Persoas Licenciadas/Diplomadas/Graduadas universitarias.
- Alumnado doutras universidades.
- PTXAS doutras universidades.
- Profesorado e persoal investigador doutras universidades.
- Alumnado do Bacharelato Internacional.
- Membros de institucións coas que a USC teña asinados convenios.
Estas tarxetas terán vixencia dun ano.
No momento da expedición da carta de lector/a da BUSC, as persoas usuarias deberán cubrir un impreso no que darán a súa conformidade para que os seus datos persoais sexan incluídos no ficheiro de usuarios/as da biblioteca, de acordo coa actual lexislación sobre protección de datos persoais. Este impreso deberá ser escaneado e achegado ao rexistro de usuario/a.
As persoas non encadradas nestas tipoloxías deberán facer unha petición por escrito ou correo-e (que debe ser escaneada e subida ao rexistro de usuario/a), dirixida ao/á director/a da biblioteca onde acudan, indicando os estudos e/ou traballos que realizan na actualidade e as razóns polas que desexan facer uso da BUSC. A data límite do carnet será a que se lles conceda.
O alumnado matriculado no Centro de Linguas Modernas non se considerará como usuario propio da BUSC. A carta de lector/a se lles concederá en función de que poidan ser asimilados/as a algunha das categorías de usuario/a establecidas pola BUSC.
Aquelas persoas que aínda reunindo estes requisitos non sexan residentes en Galicia ou manifesten a necesidade dun uso ocasional da BUSC, poderán solicitar unha tarxeta temporal de usuario/a invitado/a, polos días que dure a súa estancia, para facer uso dos servizos da BUSC, agás o préstamo a domicilio.
Cando a resposta a unha solicitude de carta de lector/a sexa negativa, valorarase a pertinencia de facer unha carta de lector/a como usuario/a invitado/a, que poderá concederse dúas veces ao ano, como máximo, á mesma persoa.
As tarxetas de lector/a teñen como período de vixencia un ano académico. Cando a estancia dos/as usuarios/as sexa inferior a un ano, a carta de lector/a terá como data de vencemento 15 días antes de que finalice a súa estancia na USC.
As cartas de lector/a poden ser renovadas se as persoas usuarias seguen cumprindo os mesmos requisitos para tela. No momento de renovar unha tarxeta, deberán modificarse no rexistro de usuario/a os datos que cambiaran respecto do ano anterior.
As persoas usuarias externas e invitadas con tarxetas caducadas non poderán facer uso do Servizo de Biblioteca da USC.
