Para citar e redactar as referencias bibliográficas en traballos académicos existen moitos manuais de estilo que establecen certas normas de uso, coa finalidade de uniformar as citas, referencias e bibliografía, de xeito que sexa máis doado para a persoa lectora identificar e localizar a información utilizada.
Estes son os estilos máis comunmente utilizados:
- ISO 690 (Xenérica)
- APA (Ciencias sociais)
- Vancouver (Ciencias biomédicas)
- MLA (Filoloxía)
- IEEE (Enxeñarías, Tecnoloxías)
- Harvard (Bioloxía, Ciencias naturais, Ciencias sociais)
Optar por un ou outro é unha decisión importante e para tomala debemos ter en conta :
- a disciplina científica obxecto da investigación, e
- as prescricións establecidas pola institución, entidade, revista onde se estuda, fai o traballo ou se publicará a obra.
As diferenzas entre un e outro estilo consisten, fundamentalmente, en:
- o uso de MAIÚSCULAS ou minúsculas na mención de autoría,
- a posición do ano de publicación,
- a puntuación e o uso de comiñas no título,
- a inclusión ou non da data de publicación.
En todo caso, no traballo debe mencionarse o estilo escollido e manter sempre a coherencia.
Exemplos de construción da referencia bibliográfica dun artigo de revista:
Estilo ISO:
VILLARES PAZ, Ramón. “Variacións sobre a “Gallaecia” e a fronteira do Miño”. Grial : revista galega de cultura, vol. 53, n. 206 (2015), p. 12-19. ISSN 0017-4181
Estilo MLA:
Villares Paz, Ramón. “Variacións sobre a “Gallaecia” e a fronteira do Miño”. Grial : revista galega de cultura 53/206 (2015) : 12-19.
Estilo APA:
Villares Paz, R. (2015). Variacións sobre a “Gallaecia" e a fronteira do Miño. Grial : revista galega de cultura, 53(206), 12-19.
