Citar en estilo MLA

A Modern Language Association é unha asociación estadounidense que representa a profesores e investigadores de lingua e literatura de todo o mundo. A asociación foi fundada en 1883 en Nova York para favorecer o impulso e o estudo das linguas modernas e das súas literaturas. Entre outras moitas actividades, a asociación publica desde finais dos anos 70 un manual de estilo que establece un sistema para rexistrar fontes documentais de xeito normalizado co fin de axudar ao traballo académico. O sistema MLA de referencia úsase amplamente nas humanidades, especialmente nos estudos de filoloxía inglesa, e tamén nos estudos de linguas e literaturas modernas, incluíndo a literatura comparada, a crítica literaria, os estudos culturais, os estudos de medios e outras disciplinas relacionadas. A edición vixente actualmente é a 9ª ed. publicada en 2021.

Cando citamos correctamente as fontes a partir das que facemos un traballo estamos reforzando diferentes aspectos positivos:

• as citas indican que se realizou unha revisión da bibliografía dispoñible sobre o tema desenvolvido
• permiten localizar a información orixinal para contrastala ou consultala directamente
• supoñen un recoñecemento do traballo realizado polos autores ou polas autoras das fontes citadas 
• cumprimos a normativa en materia de propiedade intelectual e evitamos o plaxio.

Debemos citar:

• ao reproducir literalmente varias palabras ou un parágrafo dunha obra
• ao utilizar datos obxectivos procedentes dunha fonte
• ao resumir ou parafrasear ideas, opinións, interpretacións ou conclusións doutros autores ou autoras
• cando mencionamos algún aspecto do traballo doutras persoas.

Non é necesario citar cando se trata de: 

• feitos ou datos de coñecemento común
• achegas, reflexións e ideas propias
• tampouco é necesario citar cando estás a dar a túa opinión sobre un determinado traballo sen escribir partes textuais da obra orixinal (aínda que si debemos citar ao autor ou autora).

Hai moitos e variados estilos ou normas de citación e referencia.

Algúns proceden dunha institución internacional que elabora un modelo de cita e referencia para as súas publicacións ou as dun determinado campo de coñecemento. Imos ver que estilos podemos atopar:

• Estilo APA, desenvolvido pola American Psychological Association (APA). Este estilo emprégase fundamentalmente no campo da psicoloxía, ciencias sociais e humanidades.
• Estilo MLA (Modern Language Association), empregado en lingüística e filoloxía.
• Estilo Vancouver, moi empregado en publicacións de medicina e biomedicina. Este estilo desenvolveuno o International Committee of Medical Journal Editors (ICMJE).
• Estilo IEEE, desenvolvido polo Institute of Electrical and Electronics Engineers para as súas revistas. Tamén se emprega noutras publicacións de enxeñaría.
• Estilo Chicago e Estilo Harvard, son estilos creados polas prestixiosas universidades que levan o seu nome para que o seu alumnado e profesorado empreguen a normativa elaborada pola propia Universidade.
• UNE-ISO 690:2013. Información y documentación. Directrices para la redacción de referencias bibliográficas y de citas de recursos de información [tradución da ISO 690:2010]. Non é un estilo, senón que é unha norma que marca unhas directrices para as citas e as referencias bibliográficas. Pode utilizarse en calquera disciplina.

PARA SABER MÁIS... Citas e referencias bibliográficas (Guía da BUSC)