Unha referencia é un conxunto de datos bibliográficos que permite identificar calquera documento empregado nun traballo de maneira expresa. Sitúase como nota ao pé de páxina, ao final do capítulo ou ao final de todo o texto en forma de listaxe, sendo isto último o que chamamos bibliografía.
Toda a información consultada que se inclúa no texto que se está elaborando debe citarse sen omitir nada. É importante comprobar que a cada cita lle corresponde a súa referencia na bibliografía.
É habitual que moitos vexan como sinónimos "listaxe de referencias" e "bibliografía", pero non é así, non significan o mesmo. A bibliografía inclúe fontes que foron útiles para o traballo pero non se nomearon de forma expresa nel e a listaxe de referencias sempre remite ás citas colocadas dentro do texto. Polo tanto CITA e REFERENCIA sempre van ligadas de forma bidireccional.
A bibliografía ou listaxe de referencias adoita presentarse ao final do traballo, ordenada de forma alfabética ou secuencial.
