Citar en estilo Harvard

Para preparar calquera traballo é necesario que consultemos información xa dispoñible, xa publicada, é dicir, que o documentemos. Pero cando utilizamos esa información allea (un artigo, un libro, unha web, etc.) ao redactar o noso propio texto, tanto se incluímos frases literais coma se resumimos unha idea ou a parafraseamos, debemos declarar de onde a tomamos, é dicir, temos que citar a fonte, a procedencia.

Hai que poñer polo tanto citas das fontes ao longo do texto, e tamén referencias dos traballos e bibliografía ao pé da páxina  ou ao final do documento.

Para facelo dun xeito coherente debemos empregar un estilo ou norma; no seguinte apartado podedes ver os diferentes estilos e normas de citación que hai e cales son os máis habituais nas diferentes áreas, por exemplo en ciencias adoita empregarse máis o estilo Harvard ou Vancouver que o estilo APA.

Nesta guía explicarémosvos como facelo seguindo o estilo Harvard. 

Estilos ou normas de citas

Hai moitos e variados estilos ou normas de citación e referencia.

Algúns proceden dunha institución internacional que elabora un modelo de cita e referencia para as súas publicacións ou as dun determinado campo de coñecemento. Imos ver que estilos podemos atopar:

• Estilo APA, desenvolvido pola American Psychological Association (APA). Este estilo emprégase fundamentalmente no campo da psicoloxía, ciencias sociais e humanidades.
• Estilo MLA (Modern Language Association), empregado en lingüística e filoloxía.
• Estilo Vancouver, moi empregado en publicacións de medicina e biomedicina. Este estilo desenvolveuno o International Committee of Medical Journal Editors (ICMJE).
• Estilo IEEE, desenvolvido polo Institute of Electrical and Electronics Engineers para as súas revistas. Tamén se emprega noutras publicacións de enxeñaría.
• Estilo Chicago e Estilo Harvard, son estilos creados polas prestixiosas universidades que levan o seu nome para que os seus alumnos e profesores empregaran a normativa elaborada pola propia universidade.
• Norma AENOR 2013 e ISO 210, que marcan as pautas para a cita e referencia de documentos impresos e electrónicos. Estas non se consideran estilos en si mesmos, sen embargo serven de base para un gran número de estilos que levan o apelido ISO 690.

PARA SABER MÁIS... Citas e referencias bibliográficas (Guía da BUSC)

O estilo Harvard foi creado pola Universidade de Harvard nos anos 50. Actualmente é moi empregado para citar e referenciar traballos académicos sobre todo nas áreas de ciencias. Toma como referencia a norma ISO 690. Coñécese tamén como citación autor-data pola súa estrutura de citación. 

O sistema Harvard inclúe diferentes formatos, pero coincide cos demais estilos en dous aspectos fundamentais:

• Citar dentro do texto co/s apelido/s do/a autor/a e data de publicación, xa sexa de forma directa ou indirecta. De aí o nome polo que tamén se lle coñece de  "autor-data".
• Incluír as referencias bibliográficas en forma de listaxe ordenada alfabeticamente ao final de cada traballo académico.

Co emprego de ambos procedementos, cita e referencia, identificamos claramente a autoría das fontes empregadas, evitando o plaxio.