O Asistente de Investigación é unha ferramenta baseada na intelixencia artificial xerativa (IA), que está integrada no buscador da biblioteca.
Esta ferramenta permite explorar contido académico formulando preguntas en linguaxe natural e obter respostas xeradas a partir de fontes científicas de calidade.
Pode ser un recurso rápido e eficiente, sobre todo para o estudantado dos primeiros cursos no momento de iniciar unha procura académica.
Que fai exactamente?
- Interpreta preguntas académicas ou científicas usando a tecnoloxía do ChatGPT para identificar os recursos máis relevantes.
- Ofrece unha resposta baseada nos resumos de publicacións científicas.
- Mostra as referencias bibliográficas que permiten comprobar e ampliar a información.
- Inclúe ligazóns directas das referencias ao catálogo Iacobus, para facilitar o acceso ao documento completo (se está dispoñible).
- Permite relanzar a busca directamente no catálogo Iacobus para obter máis resultados.
Que tipo de contido ofrece?
Este asistente está centrado en contido académico e científico:
- Artigos de revistas científicas.
- Libros académicos, capítulos, teses de doutoramento.
- Non inclúe patentes, artigos de prensa nin contido sen metadatos adecuados.
- Non amosa documentos marcados como retractados nin contido de determinados provedores que non permiten a recolección pola IA.
Importante:
- A ferramenta non busca en toda a Internet nin no catálogo completo da Biblioteca. Utiliza o Índice Central de Descubrimento (ICD), unha ampla base de datos con contidos académicos e científicos.
- O contido xerado pola IA pode conter erros e a calidade pode variar. É importante verificar sempre as fontes e a resposta da IA.
