Citar en estilo IEEE

Unha referencia bibliográfica é unha descrición normalizada completa de cada un dos documentos consultados no traballo, que quedan consignados nunha bibliografía final. Cada referencia está formada por unha única entrada numerada. Non se admite o uso dun número para un grupo de referencias. O número aparecerá entre corchetes, aliñado á esquerda e formando unha columna separada dos corpos das referencias:

[1]       R. Yousefian y S. Kamalasadan, “A Lyapunov function based optimal hybrid power system controller for improved transient stability”, Electr. Power Syst. Res., vol. 137, pp. 6-15, 2016.

[2]       B. Klaus y P. Horn, Robot Vision. Cambridge, MA: MIT Press, 1986.

[3]       L. Stein, “Random patterns”, en Computers and You, J. S. Brake, Ed. New York: Wiley, 1994, pp. 55-70.

A redacción de cada unha das referencias vai depender do tipo de documento, do número de autores e outros moitos elementos. Hai moita casuística, imos expoñer no apartado "Exemplos" como se deben redactar as referencias en Estilo IEEE.

1. Máis importante que seguir puntillosamente as regras do estilo é que todas as referencias dun traballo sexan consistentes e homoxéneas unhas con outras en canto á súa redacción. (E se recibimos instrucións específicas do profesorado, editorial, etc., respectalas, por suposto).
2. As referencias presentaranse ao final do traballo baixo o epígrafe “Bibliografía” ou “Referencias” (“Bibliography” ou “References” se o traballo está en inglés).
3. As referencias estarán ordenadas segundo un número correlativo. En caso de ser citadas no texto, o número da cita no texto e o da referencia deben coincidir.
4. O número aparecerá entre corchetes (como nas citas no texto) aliñado á esquerda e formando unha columna separada dos corpos das referencias, tal e como se mostra no apartado anterior.
5. Non se poden combinar referencias. Debe haber só unha referencia por cada número.
6. Os nomes de pila dos autores abrévianse á inicial seguida dun punto, e preceden sempre aos apelidos.
7. Se hai varios autores separámolos con coma, e antes do último usamos a conxunción “e” se o noso traballo é en galego, "y" se é en castelán, ou “and” se é en inglés.
8. Se hai seis ou máis autores úsase a fórmula “et al.” (“e outros” en latín) en cursiva despois do primeiro autor. Tamén é válido pór todos os autores ou usar “et al.” despois do primeiro autor se hai máis de tres autores, sempre que usemos o mesmo criterio para todas as referencias do mesmo documento.
9. Se o documento non ten autores persoais nin entidades responsables da súa creación o primeiro elemento da referencia será o título.
10. O título da parte (artigos, capítulos de libro, relatorios de congreso e similares) irá entre comiñas, seguido dunha coma se o noso traballo está en castelán ou galego. Se o noso traballo está en inglés, a coma precederá ao peche de comiñas.
11. O título da obra completa irá en cursiva.
12. En capítulos de libro e relatorios de congreso, a obra completa irá precedida da preposición “en”. Se o noso traballo está en inglés poñeremos “in”.
13. Para escribir o título respectarase o criterio de uso de maiúsculas da lingua na que está escrito o traballo referenciado.
14. Ao final da referencia irá o ano. Se se coñece, diante do ano porase o mes abreviado.
15. Os títulos de revista, os nomes de congresos e os nomes de institucións (nos informes) irán abreviados. Para poñer a abreviatura, podemos optar por:

• Se é unha revista internacional, localizar a súa abreviatura en Science and Engineering Journal Abbreviations [1]
• Se é unha revista española, localizar a súa abreviatura en DICE [2]
• Se é un congreso, unha institución, ou unha revista, pero non conseguimos localizar a abreviatura nos recursos anteriores, deberemos construíla, eliminando artigos e preposicións, mantendo completos os nomes propios (en congresos e institucións), e usando como referencia:

i. List of Title Words Abbreviations [3]
ii. IEEE Editorial Style Manual [4]